التصنيف: اغاني شبابية

قدم الفنان الشاب صاحب الصوت الرنان محمد الفاتح اغنية (عروس الرمال) بشكل مذهل…وهذه الاغنية نظمت الحانها علي إيقاع المردوم والمشهور في مناطق غرب السودان…اغنية (عروس الرمال) هي من كلمات والحان الدكتور والإعلامي عوض ابراهيم عوض….

كلمات الاغنية:

صدق صدق اللي القال القومة لعروس الرمال ودالبقا الملك الجنان سوريبو فاح والسيسبان على وحي الحان الكمان صدح البلوم في كردفان …جات روحي تردي مع ام فصود عشطانه لي المي الرهود وصل الفجر ناس اب قعود والقدله في شارع النهود…ي اب قبه يافحل الديوم انا شوقي زايد كل يوم الدنيا كوم ونحن كوم لو في ابوجهل نقدر نحوم صدق صدق اللى قال القومة لي عروس الرمال

اغنية (اللوري القاقا) هي واحدة من اغاني التراث الرائعة والتي لم تجد حظها في الظهور كأغنية رائعة…الا ان جاء الفنان الشاب حسين الصادق وقدمها للمستمع علي أعلي مستوي واستطاع ان يضع لها بصمة خاصة..واصبحت من الاغاني المطلوبة بشدة في كل المناسبات التي يتغني فيها الفنان الشاب…

كلمات الاغنية:

ﺍﻟﻠﻮﺭﻱ ﺍﻟﻘﺎﻗﺎ ﺍﻟﺴﻮﺍ ﻋﺠﺎﺟﺎ
ﺣﻠﻮ ﺍﻟﻘﺮﻳﻦ ﻛﺒﺎﻳﺘﻴﻦ
ﺁ ﺍﻟﻘﺎﻋﺪﻳﻦ ﺩﻳﻞ ﻓﺮﺍﺟﺎ
ﺍﻟﻠﻮﺭﻱ ﺍﻟﻮﻧﺎ ﺑﻌﺪ ﻣﺎ ﺍﻟﻔﻨﺎ
ﺧﻼ ﺍﻟﺨﻠﻮﻕ ﺣﺰﻧﺎﻧﻴﻦ
ﺷﺎﻝ ﻃﻴﺮ ﺍﻟﺠﻨﻪ ﻭﻗﻠﻴﺒﻲ ﺍﻟﺤﻨﻪ
ﻗﻮﻟﻮ ﻋﻮﺩﺗﻚ ﻵ ﻣﺘﻴﻦ
ﺍﻟﻠﻮﺭﻱ ﺍﻟﺒﺪﺭ ﻻ ﺯﺍﺭ ﻻ ﺧﺪﺭ
ﺧﻼ ﺍﻟﺪﻣﻮﻉ ﺗﺮﻳﺎﻧﻴﻦ
ﺷﺎﻝ ﻏﻴﻤﻲ ﺍﻟﻤﻄﺮ ﻭﺣﺰﻧﻲ ﺍﻟﻜﺘﺮ
ﻗﻮﻟﻮ ﻓﺮﺍﻗﻚ ﻵ ﻣﺘﻴﻦ
ﺍﻟﻠﻮﺭﻱ ﺍﻟﺸﺎﻟﻮ ﻣﺎ ﺷﺎﻟﻨﻲ ﻑ ﺑﺎﻟﻮ
ﺧﻼ ﺍﻷﺑﻮﻧﻲ ﺷﻤﺘﺎﻧﻴﻦ
ﺷﺎﻝ ﺷﻮﻗﻲ ﺑﺪﺍﻟﻮ ﻭﻗﻠﺒﻲ ﻭﺣﺎﻟﻮ
ﻗﻮﻟﻮ ﺷﻮﻗﻚ ﻵ ﺍﻟﻌﻴﻦ
ﺍﻟﻠﻮﺭﻱ ﺍﻟﺮﻭﻭﺡ ﺷﻮﻑ ﺭﺍﻛﺒﻮ ﺍﻟﻠﻮﻭﺡ
ﺍﻟﺸﺎﻝ ﻣﺤﺒﻮﺑﻲ ﺍﺏ ﻃﻴﺒﺎ ﻓﻮﻭﺡ
ﺍﻟﻠﻮﺭﻱ ﺣﺪﻳﺪﻭ ﺍﻟﺮﺍﻛﺒﻮ ﺑﺮﻳﺪﻭ
ﺧﻼ ﺍﻟﻌﻘﻮﻝ ﺳﺮﺣﺎﻧﻴﻦ
ﺷﺎﻝ ﻋﻴﺪﻱ ﻭﺳﻴﺪﻭ ﻭﺭﻭﺣﻲ ﻑ ﺍﻳﺪﻭ
ﻗﻮﻟﻮ ﺳﻮﻗﻚ ﻵ ﻭﻳن

قدم الثنائي معاذ بن البادية ونادر عثمان اغنية يا سمرا للفنان الكبير محمد وردي بطريقة رائعة خلال مشاركتهما في برنامج اغاني واغاني في النسخة الماضية…هذه الاغنية من كلمات الشاعر الكبير اسماعيل حسن ومن الحان واداء فنان افريقيا الاول الراحل محمد وردي..

كلمات الاغنية:
اغنية : الليلة ياسمرا

الليلة ياسمرا
يا سمارة الليلة يا سمرا

أنا بحكي ليكي
وانتي لي تحكي
كيف اقسم ليكي
وانتي ليه تبكي
وليه الزعل
أطري الأمل

لونك بديع
وطبعك وديع
وخدك يفوق
زهر الربيع
وكيف الوصال
خلي الدلال

ديمة الجميل
وشوفتو القليل
ياحليل حليل
ليالي الهنا
وين العهود
عهد الخلود

الليلة يا سمرا
يا سمارا الليلة يا سمرا

قدم الفنان الشاب محمد الجزار اغنية (من الاسكلا) وهي من روائع الحقيبة علي طريقته الخاصة…وقد تالق الفنان الشاب في أداء هذه الاغنية علي طريقته المعروفة والتي اشتهر بها….هذه الاغنية من كلمات شاعر الحقيبة الكبير (ود الرضي)…ومن الحان وأداء الحاج محمد أحمد سرور..

كلمات الاغنية:

يروي سرور قصة أغنية الأسكلا وحلى أنه رأى فتاة فاتنة الجمال ومعروفة في ذلك الوقت اسمها مليم تتجه مع أسرتها المتجهة الى الباخرة المسافرة الى جنوب السودان من الاسكلا وهي مرسى السفن السفن الذي كان يقع جنوب الهيلتون الحالي.. فتألم سرور كثيراً لفراق مليم.. فطلب من قبطان السفينه أسماء المدن التي تمر بها الباخرة.. ثم أخذها الى الشاعر ود الرضي الذي كان يجلس معه الشاعر أحمد حسين العمرابي فى دكانه بالخرطوم، وكان سرور حزينا وحكى له خبر سفر مليم، وطلب من ود الرضي تأليف أغنية لهذه المناسبة ثم إعطاه اسم المدن وعلى الفور جادت قريحة ود الرضي الشعرية بالاغنية التى يقول مطلعها:
من الأسكلا وحلا قام من البلد ولّى
دمعي للثياب بلا
بي داهي العذاب حلا وبى تذكارو بتسلى
عقلي الذاب و إختلا وين بدر التمام هلا
صفر ودع البابور راكبين قمرة اتنين دور
البابور مر (بالمجرور) شال ظبيا سكونو تلول
جبل أولياء حبيبي غشا وحصّل (للقطينة) عِشا
صاح قلبي الطفش وفشا الما ليته ينكفشا
حل زي الصقر خـوي بالبدر (الدويم) ضوّا
عاد لاحول لاقوة حبيبي حلاتو في (الكوة)
صباح الخير على أم نفلين أحيي البيها محتفلين
بدر الحسن رب اللين شرف كوستي والجبلين
هنيئا حان وقت زهاك الرنك احتفل ببهاك
وين الليلة يالنشهاك ياريت كنت في جلهاك
يا كاكا الحبيب طلاك وبعدو الزاد نفوسنا هلاك
يا ملوط حليل نزلاك ويا زمن الفراق نسلاك
بقدومك (كدوك) أصبح سوقو من الكساد أربح
أنا من نواحي صرت أبح كأني في مبرك المذبح
زاد من بعدك الانكال قلبي البي الهموم انكال
قطري العاصمة يا ملكال توفيني أنا صبري نكال
من دا الهم ما بنجا حبيبي الليلة في تونجا
ياخالق الخلوق تنجا تركاكا حلتا العنجا
صب يا دمعي لاتكون جاف وياقلبي ليه البقيت رجاف
البدر الخفى الانجاف اليوم شرف الرجاف…

تغني الفنان الشاب عمر الامين في أحدي الجلسات الفنية بأغنية فنان افريقيا محمد وردي (القمر بوبا) وهذه الاغنية من كلمات الشاعر الكبير اسماعيل حسن ومن الحان الفنان محمد وردي…
كلمات الاغنية:

الصغيرة شجيرة الأراك
ياقمر عشرة الفي سماك
شاغلة روحي وقلبي المعاك
وين لقيتك لامن آباك
القمر بوبا عليك تقيل

العيون الما بدمعن
نامن أو صاحيات يبرقن
لا بصيدن لا بعشقن
سرهن في الجوف يحرقن
كشفن رموشن أو غمضن
كلو موت ماتقول برحمن
القمر بوبا عليك تقيل

الصغيرون الما كبير
الرقيبة قزازة عصير
السنون براقن يشين
العيون متل الفناجين
مابتحش قشة تناقير
مابتشيل جردل على الزير
الزراب فوقا تقول حرير
شتتي شبار يامضمير
خلي قلوب الصبيان تطير
انتي ريحتك دمور فرير
ولا بت السودان اصيل
القمر بوبا عليك تقيل

الجزير ام بحرا حما
فيك روحي وحبي النما
مابسيبا ان بقا في السما
ما بخلي الناس تظلما
روحي في دربك سالمة
يا غرق يا جيت حازمة
القمر بوبا عليك تقيل

القديما قديما الحمام
الوديزين في موجو عام
يا مرايقة قليلة كلام
وا حلاتا تقول السلام
القمر بوبا عليك تقيل

الغزال الفوق في السلم
المحبة تزيد الألم
كل يوم اصبح لي في هم
سيسبان عودك منظم
شمعدان نفسك يامختم
البرتكان نهدك مدردم
القمر بوبا عليك تقيل

الصغيرون ام الجنا
ياكريم ربي تسلما
تبعد الشر من حلتا
جنة للأم الولدتا
الفي جبل عرفات وضعتا
تسلم البطن الجابتا
دي ترباية حبوبتا
التميرة الفي سبيطتا
الصفار صابغ خضرتا
معزورة امها كان دستا
وا هلاكي النار شافتا
معزباني انا ود حلتا
القمر بوبا عليك تقيل

الدفيفيق الدابو ني
البسيمتو بتكويني كي
اهلو ضنو عليها وعلي
حبها النساني والدي
ما بخليك ان بقيت حي
يا قصيبة السكر الني
نهدك الما رضع جني
ووب على امك ووبين علي
القمر بوبا عليك تقيل

الديوان الديمة مقشوش
بالزهور والورد معروش
بالحرير الأصلي مفروش
ريحتو مايقوما بلا رتوش
كان دا وصفو ماهو مغشوش
قدروا الساكنينو في الحوش
القمر بوبا عليك تقيل

بحر الدمير العض ونزل
مرة يسقي الفل والنخل
فيهو عام وزينا وقدل
ياهنينة البيك عقلي انشغل
بعت روحي عشان ليك اصل
وانت ابعد لي من زحل
يا قمر بوبا عليك تقيل

المبارك شيخ الضهر
العليك ساسكت وفتر
قلي جنيت ولا دستر
واي أنا المرضان مكنتر
جابو لي حكيم خير وشر
قلي يا زول مرضك كتر
سببك كم شلاخا خضر
القمر بوبا عليك تقيل

يظهر في هذا الفيديو الاخوين أحمد وحسين الصادق وهم يتغنون برائعة ثنائي العاصمة لما ترجع بالسلامة في حفل من داخل أحدي الجامعات…هذه الاغنية من كلمات الشاعر علي شبيكة ومن الحان الفنان السني الضوي…

كلمات الاغنية:

لما ترجع بالسلامة
وترجع أيامنا الجميلة
يا ثنا الروح ويا مداما
ويا عوطفنا النبيلة
تهدي ليلاتنا ابتسامة
من زمان بنقول حليلا
يوم رحيلك ياحبيبي
شفت كل الكون مسافر
لا زهر في روضة غنا
ولا زهر عطر بيادر
لا تلاقي يروي شوقي
لا حديث يجبر بخاطري
الشهور ياريتا تجري
وكل يوم ياريتو باكر
لما ترجع يا ربيعي
للقليب المشتهيكا
وزي عوايدك تحتويني
رعشة من الشوق إليك
عيونك الضحاكة تبكي
والمشاعر فايضة بيها
يا حلاتك يا ربيعي
ويا حلاة الدنيا بيك
لما ترجع بالسلامة
وترجع أيامي الجميلة
يا ثنا الروح ويامداما
ويا عواطفنا النبيلة
تهدي ليلاتنا ابتسامة
من زمان بنقول حليلا

شاهد اغنية (ناس الحلة) بصوت الفنان الشاب عاصم البنا…هذه الاغنية من كلمات الفرجوني ومن الحان الفنان عاصم البنا…

أغنية غلطة هي من أروع أغاني الفنان الراحل وفنان افريقيا الاول محمد عثمان وردي…وقد صاغ كلمات هذه الاغنية الشاعر الكبير اسماعيل حسن…شاهد هذه الاغنية بصوت الفنانة هالة دهب…

كلمات الاغنية:
قاسي قلبك علي ليه
قسى قلبك علي ليه
لو بحب يبقى ذنبي ايه
قلبي توب ..
توب من عواطفك
ايه نهاية حبه ايه
غلطة كانت غرامي ليك
وا خسارة دموعي فيك
غلطة قلبي سلمتو ليك
ما كان مكانو وما كان يجيك
يوم لقيتك علي ما كان يوم يا مبدل شجوني هوى
عني ايه قالو عني ايه
كنت تايه وكنت غريب
وانا افتكرتك اعز حبيب
ياما قلبي يخطا ويصيب
والعذاب لي كان نصيب
من عرفتك جفاني حتى النوم يا مبدل شجوني هوى
انت حبك جنيت عليه
كن طلعت القمرة وجيت
ولو حلفت برب البيت
ما بريدك ..
ما بريدك مهما بقيت غلطة كانت وكان ابيت
يا الفراقك علي كان مكتوب يا مبدل شقاي انا
انت حبك جنيت عليه

وجدت أغنية (الفطن الوسيم) شعبية جارفة عند كل فئات الفنانين من كبار وشباب…فقد صدح بها الكثير من الفنانين…هذه الاغنية هي من كلمات الشاعر الكبير محمد بشير عتيق…شاهد الاغنية بصوت الفنان الشاب علي ساجوري…

كلمات الاغنية:
الفطن الوسيم
كتابة محمد بشير عتيف
لحن محمود فلاح

للفطن الوسيم عرج يانسيم
بلغُه إشتياقي
حبي وإعتلاقي
روح يانسيم
أستقبل هلالُه
في غُرفُه وظلالُه
ومن ترفه ودلالُه
بين ذويه الو
بي حكمة ورويِّه
في قامته الروية
اتأمل شوية
وقول ليه التحية
ولو سألك علىَّ
قولُيه منامُه قلَّ
أصلُه شكايته عله
بالحب ليس إلاَّ
ومهما طال فراقي
أو عزَّ التلاقي
أنا على عهدي باقي
للفطن الوسيم
أنا عاشق مثالي
في حبي وعواطفي لايوجد مثالي
وللهوى إمتثالي
نفسي كريمْ خصالها
بى نُبل العواطف أمتازت أصاله
أشتاق للمحاسن وأتهيب وصالها
من فاتكات لحاظك ومن حدة نصاله
وهاك بعض الملامح
إني وديع مُسامح
وحبي رقيق وجامح
يبعد عن نطاقي
ولى أحبابه شاقي

تعد أغنية ايام صفانا من درر الحقيبة ان جاز وصفها…لان هذه الاغنية تحمل بين طياتها كلمات قوية ورصينة جداً كتبها شاعر الحقيبة الرائع محمد بشير عتيق وتغني بها اكثر من فنان…شاهد هذه الاغنية بصوت الثنائي ياسين وخنساء عبدالله…

كلمات الاغنية:

أيام صفانا – كلمات محمد بشير عتيق

أذكري ايام صفانا وأذكري
عهد اللقا والليالي الفي حبور

اذكري أوقات صفانا
والليالي الفيها متبادلين وفانا
إصطفينا ظروفنا والحظ إصطفانا
جينا بي كل اقتراح
من حديث يشفي الجراح
بي مغازله بي انشراح
والقمر في ضياه عالق
والنسيم يهدينا أرواح الزهور

كنا داخل روضة مافيش حد سوانا
غير ان القمري يهتف بي هوانا
من اغاريد فنو يسمعنا اسطوانه
اما ارواحنا الخفاف
رافله بي اثواب عفاف
زي عرايس يوم زفاف
والنجوم بعيون تسارق في اشتياق
تنظرنا من خلف الستار

الرياض مبتهجه ضاحك اقحوانا
والزهور نديانه تستقبل أوانا
رانعه يانعه وزاهية في ثوب أرجوانا
والنهر ليها اقترب
والطيور تسجع طرب
وعامله موسيقة قرب
أنحنا صار مجلسنا عامر في طرب
في نشوة في غبطة وحبور

يا أنيس الحسن يا سامي المكانة
من عواطفك حبي لو فاقد مكانه
اهدي لي تفاحه بس او برتكانه
فهي غير شك مرضية
منها اقتبس الضياء
بل اضوق طعم الحياه
انت ملهمني الأغاني
انت مصدر فني
و احساسي وشعوري

عندما كتب شاعر الحقيبة عمر البنا اغنية امتي ارجع لأمدر وجدت صدي واسعاً وقبولاً طيباً في وقتها…وحققت شهرة واسعة ..وقيل ان الاغنية كتبت اثناء تواجد الشاعر بمدينة شندي…شاهد الاغنية بصوت الفنان عاصم البنا…

كلمات الاغنية:
امتي ارجع لامدر واعودا

واشوف نعيم دنيتي وسعودا

امتي تلمع بروق رعودا

حظوظي تنجز لي وعودا

روحي ضاعت في النار قعودا

لي هون يا ربي عودة

اشوف حبيبتي وانظر خدودا

عساها ترحم تكون ودودة

ومسامعي تسكر من ردودا

وتطفي ناري الفاتت حدودا

اشواق كتيرة الدموع شهودة

وللمنام العيون زهودة

وفي الهجر روحي ضاع مجهودة

لم تزل حافظة لي عهودة

ياالمن فراقك ايامي سودا

خلاف وصالك دايما كسودا

غير محاسنك مين يسودا

الملوك وياسر الاسودا

ما كانو يعرفو ناس بلودة

الغرام من قبال ولودة

من يوم وضوعا الفي الخير خلودا

فاتنة النفوس طايعة وجلودة

ابواب لقاها ام خدود مصودة

ونار العذاب في الفؤاد محصودة

هناي ومنية روحي ومقصودا

اشوف رشيم يضوي بين فصودا

تتمتع الفنانة الشابة شموس ابراهيم بصوت طروب يجبرك علي إحترامه وتملك ملكات صوتية اجمع عليها الكثير من الخبراء والفنيين…شاهد شموس وهي تغني اغنية الحقيبة يا جميل يا مدلل…هذه الاغنية هي من كلمات والحان شاعر الحقيبة عبدالرحمن الريح…
كلمات الاغنية:

ياجميل يا مدلل قولي ليه بس حكم الغرام قد حلل
عذابي يدوم
++++
ياجميل يا مدلل كل ما اطراك بالدموع اتبلل
جسمي صار منحول والمنام يتقلل
طرفو لي رؤياك دمعو اكبر وهلل
جفاني النوم
++++++
بالعلي لا تجهل يا حلو النغمات يا لذيذ المنهل
نارو حارقة الجوف و المدامع تبهل
بعد هذا الحال هل وصالك يسهل
تحن يا ظلوم
++++++
ليل ضفليرك مسدل يا رشيق القامة والمعاطف الهدل
القوام ممشوق و المعاصم جدل
ده البخلي اليك حبي ما لا يتبدل
يزيد كل يوم
++++++++
ما العقول تتخيل والاديب للقاك يتهبل
بيد اني عزيز خفت في المستقبل
اهدي ليك الحب وانت بي ما تقبل
اكون محروم
+++++
في هواك لو اعزل برضي لا انساك في الخيال اتعزل
العجيبة كمان قلبي صار ليك منزل
انت فوق للقوس
والسماك الاعزل..

اغنية انا ليهم بقول كلام هي من اجمل اغاني الحماسة السودانية…اشتهر بها الفنان الراحل خلف الله حمد…هذه الاغنية كلماته قديمة جداً وقيل ان من كتبتها امراة تدعي زينب بابكر الشوبلي…شاهد هذه الاغنية بصوت فرقة السحر للاناشيد الدينية والتراث
كلمات الاغنية:
انا ليهم بقول كلام دخلوها وصقيرها حام
سم اب درق البصقع جدرى القيح البفقع
صوتك مانع برجع الطيب فى شطارتو مبدع

دخلوها وصقيرها حام انا ليهم بقول كلام

سم اب درق الجرادى تكل الجدرى البعادى
للخصيم ضربو بياذى موسى المر الحجازى

قرقر ملا للوسادة برنو و شال لى مكادة
ديل جنياتنا الندادة سيد الدار فى السيادة

قرقر فوق للدرب و ربط الهوي و الشرق
كدى ميزو لينا الضرب و ديل جنياتنا ما بتتغلب

عامر سوقك مبدر مجرجر توبك مسدر
الطيب للشر مقدر مر كالتكل المجدر

انا نميت جبت قلبو فشلو القالو قصو دربو
ديل رازوه و قصو دربو دق السندالة قلبو

عبد الدايم شك تيلو من ولدوه الشكره هيلو
الخصيم ما بجيلو صوتو بهدي قبيلو

عبد الدايم معاهو اخوانو
ضربو البلا فى بكانو
وكت رماهم قنعو قامو
الصف العمر زحامو
هو مستعد لى لطامو

انا نميت جبت غناكم يا البيينين هوي براكم
البدوركم تراكم حلق الطير لى غداكم
الصف العامر يرجاكم ؟
اتباشرو لى بلاكم و اركزو زينب وراكم

انا ليهم بقول كلام دخلوها وصقيرها حام

 

عندما تغني الراحل محمد احمد عوض بأغنية توتي والشهيرة باسم “يامراكبي عدينا” احدثت شعبية هائلة نسبة للأداء الرائع من الفنان الراحل…هذه الاغنية من كلمات الشاعر عبدالرحمن الريح…شاهد هذه الاغنية بصوت الفنان حسين الصادق..

كلمات الاغنية:
يا مراكبي عدينا على توتي ودينا
سوق معاك في الرحله شادينا
عدينا عدينا… وكان تهنا أهدينا
النيل يروي شاطينا والوادي وادينا
قوم قرب المركب..
خلي الشباب يركب..
محبوبنا كالكوكب..
نور دياجينا..
عدتنا مكتمله..
وننزل هناك جمله..
نتمشى في الرمله..
ونجلس في شاطينا..
جلستنا تحت اشجار.. متفتحه الازهار
صوت السواقي نهال.. نغماتو تشجينا
عدينا عدينا.. و كان تهنا أهدينا
النيل يروي شاطينا و الوادي وادينا
يا مراكبي عدينا على توتي ودينا
سوق معاك في الرحله شادينا…

انتهي الثنائي طلال الطاهر الشهير بطلال الساتة والفنانة إنصاف مدني من تسجيل اغنية (نعمة) وهي من كلمات الشاعر الشاب عبده منصور ومن الحان الفنان طلال الطاهر…وكان في التنفيذ الموسيقي لهذه الاغنية الثنائي وائل و دقشة…وفي الماسترينغ مصعب خلف الله

يظهر في هذا الفيديو الفانين الشباب أحمد الصادق وعاصم البنا وشريف الفحيل وهم يتغنون بأغنية الفينا مشهودة في برنامج اغاني واغاني…هذه الاغنية هي من الاغاني الحماسية السودانية الرائعة حيث تغني بها الفنان الراحل عبدالعزيز محمد داؤود ونخبة من الفنانين الكبار…هذه الاغنية هي من كلمات الشاعر الكبير محمد علي ابو قطاطي…

كلمات الاغنية:

الفينا مشهودة عارفانا المكارم انحنا بنقودا
والحارة بنخوضا
الزول بفتخر يباهي بالعندو
نحن اسياد شهامة والكرم جندو
ما في وسطنا واحداً ما انكرب زندو
البعجز يقع بيناتنا بنسندو
الحارة بنخوضا…
ركابين عليهو الناصع أب غرة
نتباشر وقت نلقى الكلام حرة
ما بننفز يمين إن متنا فد مرة
الخواف ما حر منو نتبرا
الحارة بنخوضا..
الفينا مشهودة عارفانا المكارم انحنا بنقودا
والحارة بنخوضا
للجار والصديق عشرتنا تتمنى
بنصون الأمانة السيدا أمنا
المغرور ندوسو ونعدموا الطنة
شافعنا بيرى الموت في الركاب سنة..

قام الفنان شريف الفحيل بتصوير اغنيته (مية مية) من داخل استوديوهات قناة النيل الازرق وبمصاحبة الفرقة الاثيوبية…وقد تم التنفيذ الموسيقي لهذه الاغنية بالإيقاع الاثيوبي…وكان في مصاحبة الفنان الفحيل مجموعة من الاثيوبيين حيث شاركهم الفنان الرقص علي الطريقة الاثيوبية..

اغنية عشميق الاصم هي من الاغاني السودانية الشهيرة وكلمات هذه الاغنية (تراث) وقام بأدائها اكثر من فنان…شاهد عاصم البنا يغنيها علي طريقته الخاصة…

كلمات الاغنية:
عشميق الاصم……
عليك بجر النم يا دقر الحرايق…اصبحت كاتم السم….. عشميق الاصم……
ده شدولو وركب فوق اصهب الليلين دى الهول و الشرق ….
شرفا بيعانن ليك …دى العاقر تقول بلدى تسمى عليك….
ياعيد الضحية البفتحولو البيت…رايو مكملو وكسر قلم ماك بيك ….
عليك بجر النم يا دقر الحرايق…اصبحت كارب السم……..
الليلة البلد اتباشرو ناسو….
يا بحر المحيط مين عبرو وقاسو….بريطان و الترك ما لينو راسو
ده العضم الكبير كسرو و شرب ساسو….
شدولو وركب فوق اصهبا و حشى….
رايو مكملو وكلامو مو هبشى.. اديتكم امانة متقنعة و تمشى
عاجبانى الامانة ضيف الهجعة بتعشى….
مو ضاربو الهشوش ولدا قبيل منسى …..
عكليتا كبير فرتقت ناس هكسى….
قومن شكرنو يا الكلكن قاعدات….ده اب سيطا طلع شال المسافر و فات حمدلا بسلامة يا زمام الكاهليات…
…. عليك بجر النم يا دقر الحرايق…اصبحت كاتم السم….. عشميق الاصم….

قدم الفنان الشاب شكرالله عزالدين لجمهوره العريض أفضل فيديو كليب يتم تصويره في الاونة الاخيرة…وقد تم تصوير اغنية (ساعة) بطريقة رائعة والاجمل من كل هذا طريقة المونتاج والإخراج الذي تمت للاغنية…ويتوقع ان يحصد هذا الفيديو كليب اكثر من جائزة..اغنية ساعة تعد من اجمل الاغاني التي تغني بها  شكرالله او الكازنوفا كما يلقبه جمهوره..اغنية ساعة هي من كلمات الشاعر الشاب:محمود الجيلي ومن الحان المبدعة:سامية الهندي وكان في آلة الجيتار:ابراهيم هيما وفي الهندسة الصوتية لهذه الاغنية هيدلي…