التصنيف: الامين عبد الغفار

اشيل الريد واشيل ودو واشيل نفحات عبير وردو
واشيلك في القليب نوار جميل ناير وفات حدو
مسافر سفرة المشتاق تخلي وراي ريدي بعيد
علي البعد اعاني بعاد كتير الشوق بدون تحديد
وراي ما بعرف الحاصل اريت الهاني يبقي سعيد
الون ليهو كل الشوق وارسلو ليهو باقة عيد
احملو كل نسمة تفوت توادع الغربة كل صباح
واحس في رجعة الانسام شعور احبابي كم ترتاح
امل راجيهو من بدري يتوج قلبي بالافراح
واعيد فرحا يرقص كون واطرز في خيالي وشاح
معطر بي شزي الياسمين عشان احبابي صار فواح
وما هاميني اصبح وين ولو في البعد القي جراح
كفاية احس بانو سعيد واعرف اني ذول مرتاح
ولو كان قلبو قاسي علي قساوتو تلاقي عندي سماح

باقي الدموع الفي عيني يا يمة ما بغلن عليك
لكني ما هاين على ساعة الوداع اجرح عينيك
سايقاني رعشات الفؤاد لمن أجيك واطلب رضاك
واحضن اياديك في احترام والثم جبينك في علاك
ولما انكتب ريدك على واداني من بركة دعاك
ما لقيت في قاموس الكلام احرف تناسب مستواك
يا امي بشتاق في الغياب والشوق ببين وكتين اجيك
حضنك دفأ وارحب مآب والطيبة معلم في وشيك
لمة حجاك بعد العشا وبليلتك الدايما فريك
بتجيبني من درب السلام وتسوق خطاوي الرجعة ليك
يا والده فرقنا الزمن لكن مصيرو الحي يعود
وين نلقى زي دارك وطن لو حتى في نجم السعود
قابضين على جمر البعاد بكرة الظروف حتما تجود
وتعود مراكب العز صفوف وتنوم على شاطئيك جلود

يالرحتو طولتو..يالرحتو طولتو..
وعليا ماسالتو ..
يالرحتو طولتو..وعلينا ماسالتو..
جفالت الايآم يا…الايآم ونسيتو يا انتو ..انا وين وين انتو ايااام ورا اياااام ..وتقابلت اعوام..
ايااام ورا اياااام ..وتقابلت اعوام
جفالت الايآم يا…الايآم ونسيتو يا انتو ..انا وين وين انتو اهل الوداد بالكوم..والكان عزيز خنتوه
بدلتو ريدنا خلاص وبيهو ماسالتو
كيف قالو ودرتو وشقيتو يانتو ..انا وين ووين انتو
ياريت قريب جا كلمات مراسيك ضاع
بدلتو ريدنا خلاص البيهو ماعرفتو
جفالت الايام الايام نسيت نسيتو يا انتو
انا وين و وين …انا وين ووين..

سلامْ يالمنجل المركوز على ضَهرَ البلد تِقياتْ

ومرحبْ بالترسْ ناكوسى يدفِقْ صُرة البِلداتْ

سلامْ للجَنَى البَدَّر زَرعْ جَدعَـاتْ …

للباجور عُمومْ من سوبا لى بَركاتْ

********

نَعَمْ إنو البلد نَيـَّلْ شِربْ من تُرعتو الجَرايَّة

إيدَياتِكْ على الفايتْ البعيد دنّاية

إنتى لَتيبَة إنتى شَـرايَةْ …

إنتى كِسـيرة فى مُخلايَة …

مُخلايةَ الجَنَـى البَدَر بعد ما صَلى …

شَـالْ سَلوكْتو والجَرايَّة …

إنتى التايَة

********

إنتى كَديبَة الظُهـرى الرَزَمْ قِـدَّامى

حِـنْ أخوالى جُود أعمـامى

إنتى المَسْـرى فى الدَغَشْ أبْ سِقيطـاً حامى

********

إنتي جنينة تمزج للرهد ألوان

إنتى الخَلوة فاتِح بابا لِلضيفـانْ

إنتى مَراحِـبْ أهلاً طالعَةْ مِنْ ديـوانْ

********
يا مُسدار الشَالَنْ ليلَّنْ رَتَعنْ …

ركَزَنْ فوقْ دانقَة ود حامِدْ

يا خَلواتْ بالضيفْ إدَفَّـنْ …

مِن زِيفة الصَـقطْ المِتهاوِدْ

أضربوا الكَفْ تِمـوها جَرايِدْ

********
يا جِنَيَّـات الوادى الرَّاقِـدْ

يا كَتلَةْ صافية وكَتْفِيــةْ

ويا مُهْـرةْ حَبُوبتى رِقيةْ

فيكى سُيوفْ السَوُ الدَّيَـةْ

وقَرضُوالفَزْعـَةْ القِـدَامِيَّةْ

********
يا عَمَّ الهادى عَقَـبْناكُم شِرِبـنَا قَـهاوى

دخلَنْ فُوقنا دُعْجَنْ .. قَفَرنْ بى مَهاوى

وبى عديلة الله البيضاء

قَـجَّتْ فوق فُرقَانَة الفَـرْحَـةْ

ورَقَصـتْ نِعْـمَةْ البِتْ السَـمْحَة .. لون القَمحَة

وبَشَّـتْ فوق وِديانَّا الفرحة

تباركْ الله … يا رسُول اللهْ

مِنْ عِينْ الحَسودْ خَـلق الله …

يا رسول الله

********
والله يا طِينَة جزيرتى الخضراءْ

لِغيرِكْ إنتى ما غَنيتْ بِدوبايَة

ولغيرِكْ إنتى مابنكَتِبْ حَرفـاً

يسيلْ مُرتاحْ على دَواية

لِغيرِكْ إنتى ما حسيتْ إنو الدُنيا سَوَّاية

خليل العازة آه بتخيل قصاد أم در وزازيناً حلات العوم …
بشوف الدنيا وردية وهناك إيدين عليها الصيد ورد قيل وخدر مقرن الخرطوم …
أه .. أه غناياً بشق الليل على المردوم قبل توتي وضريح الشيخ جنا أم مريوم ..
ودرويشاً غرق ترجم مع النوبات وذكر الله وحي قيوم ..
يا السراي رجال الليل ويابا التوم ويا دفع الله صايم ديما ريس القوم …
حليل أهلي البشابيلم تقول مفطوم حليلم هم قدر ما أطش أشوفم في سمايا نجوم …
ببكي الخال ..دمع هطال صبيب مو رش نجيض مو هش بطانة الخير بشوش وخدوم …
كريماً جود .. وجود أروش خريف الدالي والمزموم …
سريع النهمة مو منكش إكفي الناس عموم وعموم …
إيقن جوف ضعيفاً باكي وإكفكف دمعة المظلوم ..
….. فارقنا أعز الناس أه يا مسافر نار الشوق شديدة خلاص ..
قلت ليها ما تمشي .. في الغربة ما شي
تومك حنين تاتي …
بحكي ليهو عز الليل أحكي ودموعي تسيل لا الفنان والمنديل وين يا مسافر نار الشوق شديدة خلاص …
ما بسمع كلا م ا لناس .. حبيبي إخلاص .. فيه الرقة والإحساس …