التصنيف: انصاف مدني

فيديو .. انصاف مدني – بلال تزورني مرة

بلال تزورني مره
يوم قالو ليك وقالوا ما عليك
وانت قاسي وانا راضيه بيك
يا بلال تزورني مره
كلام الاهل سبب زعل
لو انت وزه انا ليك بحر
بلال تزورني مره
قلبي حباك ما يوم قساك
انت صوره اتقلبت ملاك
يا بلال تزورني مره

فيديو .. انصاف مدني – ليهم بقول سلام

دخلوها وصقيرها حام انا ليهم بقول كلام

سم اب درق الجرادى تكل الجدرى البعادى
للخصيم ضربو بياذى موسى المر الحجازى

دخلوها وصقيرها حام انا ليهم بقول كلام

قرقر ملا للوسادة برنو و شال لى مكادة
ديل جنياتنا الندادة سيد الدار فى السيادة
قرقر فوق للدرب و ربط الهوي و الشرق
كدى ميزو لينا الضرب و ديل جنياتنا ما بتتغلب

دخلوها وصقيرها حام انا ليهم بقول كلام

عامر سوقك مبدر مجرجر توبك مسدر
الطيب للشر مقدر مر كالتكل المجدر

دخلوها وصقيرها حام انا ليهم بقول كلام

انا نميت جبت قلبو فشلو القالو قصو دربو
ديل رازوه و قصو دربو دق السندالة قلبو

دخلوها وصقيرها حام انا ليهم بقول كلام

عبد الدايم شك تيلو من ولدوه الشكره هيلو
الخصيم ما بجيلو صوتو بهدي قبيلو

انا ليهم بقول كلام دخلوها وصقيرها حام انا ليهم بقول كلام

عبد الدايم معاهو اخوانو
ضربو البلا فى بكانو
وكت رماهم قنعو قامو
الصف العمر زحامو
هو مستعد لى لطامو

انا ليهم بقول كلام دخلوها وصقيرها حام انا ليهم بقول كلام

انا نميت جبت غناكم يا البيينين ( يا الزينين ) هوي براكم
البدوركم تراكم حلق الطير لى غداكم
الصف العامر يرجاكم ؟
اتباشرو لى بلاكم و اركزو زينب وراكم

انا ليهم بقول كلام دخلوها وصقيرها حام انا ليهم بقول كلام

فيديو .. انصاف مدني – الآلاف درجن


الآلاف درجن ولدا نجيض ماك ني
البجرجر فى ام صقير وحدي
********
غنى وشكري يا اختو يا ريا
تمساح الكوانى الضارب الليه
سمعنا لنا خبرا في الهلالية
خمستاشر جواد سكن سبعماية
*******
من قومة الجهل ما خوفوك بى أخ
تور بقر الجواميس الرقادن لخ
نقرولو أم هبك الضربخانه يدخ
قرنك بفتح الهامه وبيمرق المخ
*******
أنا قولي ليك صحيح
ياركاب على شلق بنات الريح
ياجدرى النزيله الدم كرف في القيح
ادريس صاقعة التلوي المقابله السيح
*******
ما بيحركو الكشكيش
والقلب ان رجف ما بنفع الحريش
الجنيات وراك في الحلة آفة عيش
ود المقدره البيعزم على المافيش

فيديو: إنصاف مدني تغني (لو بتريد وريدك باين)

بثت قناة أم درمان الفضائية سهرة بعنوان (كورة وفن) بمناسبة عيد الفطر المبارك شارك فيها نخبة من الإعلاميين والرياضيين بقيادة الإعلامية عفاف حسن أمين وكابتن الهلال والسودان السابق حمد كمال ونجم تيراب الكوميديا محمد موسي والفنانة إنصاف مدني ومن تقديم الإعلامي عوض الجيد الكباشي.

خلال هذه السهرة قدمت المطربة إنصاف مدني عدد من الأغنيات من بينها أغنية (لو بتريد وريدك باين).

وقد تفاعل الضيوف مع هذه الأغنية والتي تعد من أجمل الأغاني التي تغنت بها المطربة إنصاف مدني.

فيديو…إنصاف مدني أغنية (جمل الشيل)

بثت قناة أم درمان الفضائية سهرة بعنوان (كورة وفن) خلال أيام عيد الفطر المبارك.إستضافت من خلالها عدد من الإعلاميين علي رأسهم الإعلامي والصحفي مرتضي ميرغني والإعلامية عفاف حسن أمين والكوميديان محمد موسي ولاعب الهلال والمنتخب القومي السابق حمد كمال بالإضافة للمطربة إنصاف مدني ومن تقديم الإعلامي عوض الجيد الكباشي.
وقد قدمت المطربة الشابة إنصاف مدني عدد من الأغاني من بينها أغنية (جمل الشيل)