غريب وحيد
فى غربتو
حيران يكفكف دمعتو
حزنان يغالب لوعتو
ويتمنى …
بس لي أوبتو
طال بيهو الحنين
فاض بيهو الشجن
واقف يردد من زمن

بالله ..
يا الطير المهاجر للوطن
زمن الخريف
تطير بسراع
تطير ما تضيع زمن
اوعك تقيف
وتواصل حلق
في الصباح
تحت المطر
وسط الرياح
وكان تعب منك جناح
فى السرعه زيد
فى بلادنا ترتاح
ضل النخيل
أريح سكن

فوت بلاد ..
سيب بلاد ..
وان جيت بلاد
وتلقى فيها النيل
بيلمع فى الضلام
زى سيف مجوهر
بالنجوم من غير نظام
تنزل هناك وتحيى
يا طير باحترام
وتقول سلام …
وتعيد سلام
على نيل بلادنا
سلام
وشباب بلادنا
سلام
ونخيل بلادنا
سلام

بالله ياطير
قبل ما تشرب تمر
على بيت صغير
من بابو
من شباكو
بيلمع الف نور
تلقى الحبيبه
بتشتغل منديل حرير
لحبيب بعيد
تقيف لديها
وتبوس ايديها
وانقل اليها وفائي ليها
وحبى الاكيد



القسم :

محمد وردي

اترك رد

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.