قول لي ياطير الخداري .. قول لي وحيات حبنا .. وين رسايلك يا حليلا
وين عيونك مننا

نحنا ناس بنعيش حياتنا
الغالية بالنية السليمة
كل زول دايرين سعادتو
بتشهد الأيام عليمة
يا حليل كسلا الوريفة
الشاربة من الطيبة ديمة
وكم أسر فنان جمالا
وخلي قلبو عليها غيمة

ساب ديارنا وفاتنا يا طير
مالو فات أهلو وديارو
والفراق بتقول عيونو
قسمة.. ما كان لا اختيارو
يلا لتوتيل نزورا
والجبل نعسان خدارو
وحتي السواقي بكت معاي
وشاركت في وداع قطارو

فارق ارض القاش وروح
خلي ارض القاش حزينة
وقدر ما حاولنا نكتم جرحنا
و نسكت.. بكينا
تاني ضحكتو يا حليلا
البتملا بيتنا زهور وزينة
يا حبايب الريد قطارو
اخروه شوية لينا



اترك رد

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.