يا نسايم
جيبي ليّ اخبار حبيبي
وشوفي ليه؟
قاطع الرسايل يا نسايم اعلو طيبي

اصلو طوّل مني غايب
وماني عارف كيف اطولو
ولسه مترقب مجيهو
وما عرفت متين وصولو
الامل سايق خطايه
وراجي تتغير فصولو
ومنتظر ازهارنا تزهر
بالحنين تغمر حقولو

شيلي اشواقي وحنيني
وامشي لي ارض المحنه
وقولي لي زولي البريدو
مالو لو يوم قلبو حنه
يا حبيبي انا ما نسيتك
لا يشيل خاطرك مظنه
وافتقدك حنان رسايلك
وروعه الناس في بلدنا

يا نسايم
اوعي تقسي
ولي حبيب الروح تلومي
وياما كفكف لي دموعي
وشال معاي المي وهمومي
راضي عنو اذا تجني
وطيفو ما سافر نجومي
بكره شمسو اكيد بتشرق
وتنقشع ظلمه غيومي

قولي ليهو
عشان عيونك
في دروب الشوق مسافر
لو الاقي خريف يجيبك
شايل الافراح بشاير
وحتي لو طال ارتحالي
وما لقيت لي دربي اخر
ما بشوف غيرك حياتي
وغير عيونك ماني داير

ما خلاص يا غالي هانت
والاماني بقت قريبي
وجاي ليك ارتاح معاك
وانسي مر ايام صعيبي
بكره نرّجع لي بلدنا
ونبني دار بالريد رحيبي
وتاني تخضرّه السواقي
وبالفرح ينقر دليبي
يا نسايم



اترك رد

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.